20 ára afmæli Fuglaathugunarstöðvar Suðausturlands
Á árinu fagnaði Fuglaathugunarstöð Suðausturlands 20 ára afmæli sínu og í tilefni þess var gefið út 20. ára afmælisrit. Þar má finna ýmsar skemmtilegar og fræðandi greinar tengdum fuglum og starfsemi stöðvarinnar. Starfsfólk Náttúrustofu Suðausturlands skrifuðu í ritið tvær greinar, „Samstarf Náttúrustofu Suðausturlands og Fuglaathugunarstöðvar Suðausturlands“ og „Frá blómaskeiði til válista: Saga skúmsathugana á Suðausturlandi“. Ritið var borið í öll hús í Sveitarfélaginu Hornafirði en áhugasamir aðilar utan sveitarfélagsins geta fengið ritið gegn stuðningsgreiðslu til Fuglaathugunarstöðvarinnar, kr. 3000 með því að senda beiðni á Brynjúlf Brynjólfsson (bjugnefja@smart.is). Fuglaathugunastöðin heldur einnig úti facebook síðu þar sem fylgjast má með störfum hennar.
Frá stofnun Náttúrustofu Suðausturlands árið 2013 hefur samstarf hennar við Fuglaathugunarstöðina verið af ýmsum toga en verkefni tengd helsingja og skúm hafa haft mestan sess. Það er þó ekki bara fjöldi verkefna sem stendur uppi sem ávöxtur samstarfsins heldur líka hversu gott það hefur verið. Hjálpsemi starfsmanna Fuglaathugunarstöðvarinnar hefur verið dýrmæt stoð fyrir starfsfólk Náttúrustofunnar og þekking þeirra á fuglum og öðru náttúrutengdu er ómetanleg auðlind inn í okkar vinnu. Við óskum Fuglaathugunarstöðinni hjartanlega til hamingju með stórafmælið, megi starf hennar halda áfram að blómstra og dafna. Einnig þökkum við kærlega fyrir gott samstarf og hlökkum til áframhaldandi samvinnuverkefna.
Afmælisrit Fuglaathugunarstöðvar Suðausturlands